ദോഹ: ആപ്പിൾ ഐ.ഒ.എസ് (iOS) സോഫ്റ്റ്‌വെയറുകളിൽ കണ്ടെത്തിയ ഗുരുതരമായ സുരക്ഷാ പിഴവുകൾ ചൂഷണം ചെയ്യപ്പെടാൻ സാധ്യതയുള്ളതിനാൽ ഉപയോക്താക്കൾ അടിയന്തരമായി ഫോണുകൾ അപ്‌ഡേറ്റ് ചെയ്യണമെന്ന് ഖത്തർ ദേശീയ സൈബർ സുരക്ഷാ ഏജൻസി (NCSA) നിർദ്ദേശിച്ചു. അത്യാധുനിക ചാരവൃത്തികൾക്കായി (Espionage Operations) ഈ സുരക്ഷാ പിഴവുകൾ ഉപയോഗിക്കപ്പെട്ടേക്കാമെന്ന ആപ്പിളിന്റെ മുന്നറിയിപ്പിന് പിന്നാലെയാണിത്.
സംശയാസ്പദമായ ലിങ്കുകളോ അജ്ഞാത സന്ദേശങ്ങളോ തുറക്കുമ്പോൾ അതീവ ജാഗ്രത പാലിക്കണമെന്നും അധികൃതർ അറിയിച്ചു.
ഉപയോക്താക്കളെ വ്യാജ വെബ്‌സൈറ്റുകളിലേക്കോ ലിങ്കുകളിലേക്കോ ആകർഷിച്ച് ഉപകരണത്തിന്റെ നിയന്ത്രണം ഏറ്റെടുക്കാൻ ഹാക്കർമാർക്ക് സാധിക്കുമെന്നാണ് കണ്ടെത്തൽ. മാർച്ച് 11-നാണ് ആപ്പിൾ ഇതുസംബന്ധിച്ച ഏറ്റവും പുതിയ സുരക്ഷാ അപ്‌ഡേറ്റ് പുറത്തിറക്കിയത്.ഐ.ഒ.എസ് 15 (iOS 15) മുതൽ പുതിയ പതിപ്പായ ഐ.ഒ.എസ് 26 (iOS 26) വരെയുള്ള സോഫ്റ്റ്‌വെയറുകളിൽ നിലവിൽ സുരക്ഷാ ക്രമീകരണങ്ങൾ ലഭ്യമാണ്. ഈ പതിപ്പുകൾ ഉപയോഗിക്കുന്നവർ ഫോൺ അപ്‌ഡേറ്റ് ചെയ്തിട്ടുണ്ടെന്ന് ഉറപ്പുവരുത്തണം.ഐ.ഒ.എസ് 13, ഐ.ഒ.എസ് 14 എന്നീ പഴയ പതിപ്പുകളിൽ പ്രവർത്തിക്കുന്ന ഫോണുകളെയാണ് നിലവിൽ ഹാക്കർമാർ ലക്ഷ്യമിടുന്നത്. ഈ പതിപ്പുകൾക്കായുള്ള പ്രത്യേക സുരക്ഷാ പാച്ചുകൾ അടുത്ത ദിവസങ്ങളിൽ പുറത്തിറക്കുമെന്ന് ആപ്പിൾ അറിയിച്ചിട്ടുണ്ട്.
സൈബർ ആക്രമണ സാധ്യതകൾ കുറയ്ക്കുന്നതിനായി സോഫ്റ്റ്‌വെയറുകൾ യഥാസമയം അപ്‌ഡേറ്റ് ചെയ്യേണ്ടത് അത്യന്താപേക്ഷിതമാണെന്ന് സൈബർ സുരക്ഷാ ഏജൻസി വ്യക്തമാക്കി.
